## Tafsir Rasag, Genesis ###### Tafsir Rasag, Genesis 19:1 [Tafsir Rasag, Genesis 19:1](https://torahapp.org/share/book/Tafsir%20Rasag/s/Genesis/r/19:1) ת̇ם דכ̇ל אלמלכאן אלי סדום וקת אלעשא ולוט ג̇אלס עלי באב סדם פלמא ראהמא קאם תלקאהמא וסג̇ד עלי וג̇הה עלי אלארץ̇ ###### Tafsir Rasag, Genesis 19:2 [Tafsir Rasag, Genesis 19:2](https://torahapp.org/share/book/Tafsir%20Rasag/s/Genesis/r/19:2) וקאל ברגבה יה סידי מילא אלאן אלי בית עבדכמא וביתא ואגסלא ארג̇לכמא ותדלג̇אן ותמצ̇אן פי טריקכמא קאלא לא אלא פי אלרחבה נבית ###### Tafsir Rasag, Genesis 19:3 [Tafsir Rasag, Genesis 19:3](https://torahapp.org/share/book/Tafsir%20Rasag/s/Genesis/r/19:3) חתי אלח עליהמא ג̇דא פמאלא אליה ודכ̇לא מנזלה פצנע להם מג̇לסא וכ̇בז פטירא פאכלו ###### Tafsir Rasag, Genesis 19:4 [Tafsir Rasag, Genesis 19:4](https://torahapp.org/share/book/Tafsir%20Rasag/s/Genesis/r/19:4) קבל אן ינצ̇ג̇עו פאד̇א באהל אלקריה אהל סדום קד אחאטו באלמנזל מן שאב אלי שיך̇ וג̇מיע אלקום אלד̇י פי נאחיתה ###### Tafsir Rasag, Genesis 19:5 [Tafsir Rasag, Genesis 19:5](https://torahapp.org/share/book/Tafsir%20Rasag/s/Genesis/r/19:5) פדעו בלוט וקאלו לה אין אלקום אלד̇ין דכ̇לו אליך אלילה אכ̇רג̇הם אלינא חתי נואקעהם ###### Tafsir Rasag, Genesis 19:6 [Tafsir Rasag, Genesis 19:6](https://torahapp.org/share/book/Tafsir%20Rasag/s/Genesis/r/19:6) פכ̇רג̇ אליהם לוט אלי אלבאב וסד אלמצראע וראה ###### Tafsir Rasag, Genesis 19:7 [Tafsir Rasag, Genesis 19:7](https://torahapp.org/share/book/Tafsir%20Rasag/s/Genesis/r/19:7) קאל יא אכ̇ותי לא תסיו אליהם ###### Tafsir Rasag, Genesis 19:8 [Tafsir Rasag, Genesis 19:8](https://torahapp.org/share/book/Tafsir%20Rasag/s/Genesis/r/19:8) הוד̇א לי אבנתאן לם יערפא רג̇לא אכ̇רג̇המא אליכם ואצנעו בהמא מא חסן ענדכם עדא להאולי אלקום לא תצנעו שיא לאנהם דכ̇לו תחת ט̇ל סקפי ###### Tafsir Rasag, Genesis 19:9 [Tafsir Rasag, Genesis 19:9](https://torahapp.org/share/book/Tafsir%20Rasag/s/Genesis/r/19:9) פקאלו תקדם אלי ההנא ת̇ם קאלו ואחד ג̇א ליסכן מענא וצאר יחכם עלינא אלאן נסי אליך אכת̇ר מנהם פאלחו עלי לוט ג̇דא ותקדמו ליכסרו אלמצראע ###### Tafsir Rasag, Genesis 19:10 [Tafsir Rasag, Genesis 19:10](https://torahapp.org/share/book/Tafsir%20Rasag/s/Genesis/r/19:10) פמד אלקום אידיהם ואדכ̇לו לוט אליהם אלי אלבית וגלקו אלמצראע ###### Tafsir Rasag, Genesis 19:11 [Tafsir Rasag, Genesis 19:11](https://torahapp.org/share/book/Tafsir%20Rasag/s/Genesis/r/19:11) ואלקום אלד̇י בבאב אלבית צ̇רבוהם באלעשא מן שאב אלי שיך̇ פעג̇צו ען וג̇וד אלבאב ###### Tafsir Rasag, Genesis 19:12 [Tafsir Rasag, Genesis 19:12](https://torahapp.org/share/book/Tafsir%20Rasag/s/Genesis/r/19:12) וקאלו אלקום ללוט מן לך ההנא איצ̇א מן צהר ובניך ובנאתך וג̇מיע מא לך פי אלבלד אכ̇רג̇ה מן הד̇א אלמוצ̇ע ###### Tafsir Rasag, Genesis 19:13 [Tafsir Rasag, Genesis 19:13](https://torahapp.org/share/book/Tafsir%20Rasag/s/Genesis/r/19:13) לאנא מהלכון הד̇א אלמוצ̇ע למא עט̇ם צראכ̇הם בין ידי אללה פבעת̇נא לנהלכהם ###### Tafsir Rasag, Genesis 19:14 [Tafsir Rasag, Genesis 19:14](https://torahapp.org/share/book/Tafsir%20Rasag/s/Genesis/r/19:14) פכ̇רג̇ לוט וכלם אצהארה אלמתזוג̇ן בבנאתיה וקאל להם קומו אכ̇רג̇ו מן הד̇א אלמוצ̇ע לאן אללה מהלכה פכאן ענדהם כאללאעב ###### Tafsir Rasag, Genesis 19:15 [Tafsir Rasag, Genesis 19:15](https://torahapp.org/share/book/Tafsir%20Rasag/s/Genesis/r/19:15) פלמא כאן ענד טלוע אלפג̇ר אלח אלמלאיכה עלי לוט קאילין קם כ̇ד̇ זוג̇תך ואבנתיך אלמוג̇ודתין כילא תנסאף בד̇נוב אהל אלבלד ###### Tafsir Rasag, Genesis 19:16 [Tafsir Rasag, Genesis 19:16](https://torahapp.org/share/book/Tafsir%20Rasag/s/Genesis/r/19:16) פתלבת̇ ואמסך אלקום בידה וביד זוג̇תה ויד אבנתיה בשפקה אללה עליה פאכ̇רג̇וה וודעוה כ̇ארג̇ אלקריה ###### Tafsir Rasag, Genesis 19:17 [Tafsir Rasag, Genesis 19:17](https://torahapp.org/share/book/Tafsir%20Rasag/s/Genesis/r/19:17) פלמא אכ̇רג̇הם אלי ברא קאל לה אנג̇ בנפסך לא תלתפת וראך ולא תקף פי שי מן אלמרג̇ ותכ̇לץ אלי אלג̇בל כילא תנסאף ###### Tafsir Rasag, Genesis 19:18 [Tafsir Rasag, Genesis 19:18](https://torahapp.org/share/book/Tafsir%20Rasag/s/Genesis/r/19:18) פקאל לוט להמא ברגבה לא יא רסולי אללה ###### Tafsir Rasag, Genesis 19:19 [Tafsir Rasag, Genesis 19:19](https://torahapp.org/share/book/Tafsir%20Rasag/s/Genesis/r/19:19) הוד̇א קד וג̇ד עבדך חטיא ענדך וכת̇רת פצ̇לך אלד̇י צנאעתה מעי לתחיי נפסי ואנא לא אטיק אלתכ̇לץ אלי אלג̇בל כילא תלחקני אלבליה פאמות ###### Tafsir Rasag, Genesis 19:20 [Tafsir Rasag, Genesis 19:20](https://torahapp.org/share/book/Tafsir%20Rasag/s/Genesis/r/19:20) הוד̇א הד̇ה אלקריה קריבה אן יהרב אליהא והי צגירה פאתכ̇לץ אליהא עלי אנהא צגירה ותחיא נפסי ###### Tafsir Rasag, Genesis 19:21 [Tafsir Rasag, Genesis 19:21](https://torahapp.org/share/book/Tafsir%20Rasag/s/Genesis/r/19:21) קאל לה הוד̇א קד שפעתך פי הד̇א אלאמר איצ̇א לילא אקלב אלקריה אלתי סאלת פיהא ###### Tafsir Rasag, Genesis 19:22 [Tafsir Rasag, Genesis 19:22](https://torahapp.org/share/book/Tafsir%20Rasag/s/Genesis/r/19:22) אסרע תכ̇לץ אלי ת̇ם פאני ליס אטיק אן אצנע שיא אלי אן תדכ̇להא אלי ת̇ם לד̇לך סמית אלקריה זגר ###### Tafsir Rasag, Genesis 19:23 [Tafsir Rasag, Genesis 19:23](https://torahapp.org/share/book/Tafsir%20Rasag/s/Genesis/r/19:23) אלשמס כ̇רג̇ת עלי אלארץ̇ ולוט דכ̇ל אלי זגר ###### Tafsir Rasag, Genesis 19:24 [Tafsir Rasag, Genesis 19:24](https://torahapp.org/share/book/Tafsir%20Rasag/s/Genesis/r/19:24) ואללה אמטר עלי סדום ועלי עמרה כבריתא ונארא מן ענדה מן אלסמא ###### Tafsir Rasag, Genesis 19:25 [Tafsir Rasag, Genesis 19:25](https://torahapp.org/share/book/Tafsir%20Rasag/s/Genesis/r/19:25) פקלב תלך אלקרי וסאיר אלמרג̇ וג̇מיע סכאנהא חתי נבאת אלארץ̇ ###### Tafsir Rasag, Genesis 19:26 [Tafsir Rasag, Genesis 19:26](https://torahapp.org/share/book/Tafsir%20Rasag/s/Genesis/r/19:26) פאלתפתת זוג̇תה וראה פצארת נצבה מלח ###### Tafsir Rasag, Genesis 19:27 [Tafsir Rasag, Genesis 19:27](https://torahapp.org/share/book/Tafsir%20Rasag/s/Genesis/r/19:27) פאדלג̇ אברהים באלגדאה אלי אלמוצ̇ע אלד̇י וקף ת̇ם בין ידי אללה ###### Tafsir Rasag, Genesis 19:28 [Tafsir Rasag, Genesis 19:28](https://torahapp.org/share/book/Tafsir%20Rasag/s/Genesis/r/19:28) פאשרף עלי וג̇ה סדם ועמרה וסאיר ארץ̇ אלמרג̇ פנט̇ר פאד̇א קד צעד דכ̇אנהא כקתאר אלאתון ###### Tafsir Rasag, Genesis 19:29 [Tafsir Rasag, Genesis 19:29](https://torahapp.org/share/book/Tafsir%20Rasag/s/Genesis/r/19:29) ולמא אהלך אללה קרי אלמרג̇ ד̇כר אללה אברהים פאטלק ללוט מן וסט אלמקלב בעד מא קלב אלקרי אלתי כאן יסכנהא לוט ###### Tafsir Rasag, Genesis 19:30 [Tafsir Rasag, Genesis 19:30](https://torahapp.org/share/book/Tafsir%20Rasag/s/Genesis/r/19:30) פצעד לוט מן זגר ואקאם פי אלג̇בל ואבנתאה מעה אד̇ כ̇אף אן יקים פי זגר פקאם פי אלמגארה הו ואבנתאה ###### Tafsir Rasag, Genesis 19:31 [Tafsir Rasag, Genesis 19:31](https://torahapp.org/share/book/Tafsir%20Rasag/s/Genesis/r/19:31) וקאלת אלכברי ללצגרי אבונא שיך̇ וליס רג̇ל פי אלבלד ידכ̇ל אלינא כסביל אלנאס ###### Tafsir Rasag, Genesis 19:32 [Tafsir Rasag, Genesis 19:32](https://torahapp.org/share/book/Tafsir%20Rasag/s/Genesis/r/19:32) תעאלי נסקי אבאנא כ̇מרא ונצ̇אג̇עה ונסתבקי מן אבנא נסלא ###### Tafsir Rasag, Genesis 19:33 [Tafsir Rasag, Genesis 19:33](https://torahapp.org/share/book/Tafsir%20Rasag/s/Genesis/r/19:33) פסקתא אבאהמא כ̇מרא פי תלך אללילה וג̇את אלכברי פצ̇אג̇עתה ולם יעלם בניאמהא וקיאמהא ###### Tafsir Rasag, Genesis 19:34 [Tafsir Rasag, Genesis 19:34](https://torahapp.org/share/book/Tafsir%20Rasag/s/Genesis/r/19:34) פלמא כאן מן גד קאלת אלכברי ללצגרי הוד̇א צ̇אג̇עת אמס אבי פנסקיה כ̇מרא אללילה איצ̇א ותעאלי צ̇אג̇עיה ואסתבקי מנה נסלא איצ̇א ###### Tafsir Rasag, Genesis 19:35 [Tafsir Rasag, Genesis 19:35](https://torahapp.org/share/book/Tafsir%20Rasag/s/Genesis/r/19:35) פסקתא פי תלך אללילה אבהאמא כ̇מרא וקאמת אלצגרי פצ̇אג̇עתה ולם יעלם בניאמהא ולא בקיאמהא ###### Tafsir Rasag, Genesis 19:36 [Tafsir Rasag, Genesis 19:36](https://torahapp.org/share/book/Tafsir%20Rasag/s/Genesis/r/19:36) פחמלתא אבנתא לוט מן אביהמא ###### Tafsir Rasag, Genesis 19:37 [Tafsir Rasag, Genesis 19:37](https://torahapp.org/share/book/Tafsir%20Rasag/s/Genesis/r/19:37) וולדת אלכברי אבנא ואסמתה מאב הו אבו אלמואביין אלי אליום ###### Tafsir Rasag, Genesis 19:38 [Tafsir Rasag, Genesis 19:38](https://torahapp.org/share/book/Tafsir%20Rasag/s/Genesis/r/19:38) ואלצגרי איצ̇א ולדת אבנא ואסמתה בן עמי והו אבו בני עמאן אלי אליום