## Tafsir Rasag, Genesis ###### Tafsir Rasag, Genesis 26:1 [Tafsir Rasag, Genesis 26:1](https://torahapp.org/share/book/Tafsir%20Rasag/s/Genesis/r/26:1) ת̇ם כאן ג̇וע פי אלבלד סוי אלג̇וע אלאול אלד̇י כאן עלי עהד אברהים ומצ̇א אסחק אלי אבימלך מלך פלסטין אלי אלכ̇לוץ ###### Tafsir Rasag, Genesis 26:2 [Tafsir Rasag, Genesis 26:2](https://torahapp.org/share/book/Tafsir%20Rasag/s/Genesis/r/26:2) פתג̇לא לה אללה פקאל לא תנזל אלי מצר אקם פי אלבלד אלד̇י אקול לך ###### Tafsir Rasag, Genesis 26:3 [Tafsir Rasag, Genesis 26:3](https://torahapp.org/share/book/Tafsir%20Rasag/s/Genesis/r/26:3) ובאלעאג̇ל אסכן הד̇א אלבלד ואכון מעך ואבארך עליך פאני לך ולנסלך אעטי הד̇ה אלבלדאן ואפי באלקסם אלד̇י אקסמת לאברהים אביך ###### Tafsir Rasag, Genesis 26:4 [Tafsir Rasag, Genesis 26:4](https://torahapp.org/share/book/Tafsir%20Rasag/s/Genesis/r/26:4) ואכת̇ר נסלך ככואכב אלסמא ואעטיהם ג̇מיע הד̇ה אלבלדאן ויתבארך בהם ג̇מיע אמם אלארץ̇ ###### Tafsir Rasag, Genesis 26:5 [Tafsir Rasag, Genesis 26:5](https://torahapp.org/share/book/Tafsir%20Rasag/s/Genesis/r/26:5) ג̇זא מא קבל אברהים קולי וחפט̇ מא אסתחפט̇תה מן רסומי ווצאיאי ושראיעי ###### Tafsir Rasag, Genesis 26:6 [Tafsir Rasag, Genesis 26:6](https://torahapp.org/share/book/Tafsir%20Rasag/s/Genesis/r/26:6) פאקאם אסחק פי אלכ̇לוץ ###### Tafsir Rasag, Genesis 26:7 [Tafsir Rasag, Genesis 26:7](https://torahapp.org/share/book/Tafsir%20Rasag/s/Genesis/r/26:7) ת̇ם סאלה אהל אלמוצ̇ע ען זוג̇תה פקאל הי אכ̇תי לאנה תכ̇וף אן יקול הי זוג̇תי קאילא כילא יקתלני אהל אלבלד עליהא אד̇ הי חסנה אלמנט̇ר ###### Tafsir Rasag, Genesis 26:8 [Tafsir Rasag, Genesis 26:8](https://torahapp.org/share/book/Tafsir%20Rasag/s/Genesis/r/26:8) פלמא טאלת לה איאם מקאמה ת̇ם אטלע אבימלך מלך פלסטין מן כוה לה פנט̇ר פאד̇א אסחק ילאעב רבקה זוג̇תה ###### Tafsir Rasag, Genesis 26:9 [Tafsir Rasag, Genesis 26:9](https://torahapp.org/share/book/Tafsir%20Rasag/s/Genesis/r/26:9) פדעא בה וקאל אד̇ הי זוג̇תך לם קלת הי אכ̇תי קאל אני תכ̇ופת אן אקתל בסבבהא ###### Tafsir Rasag, Genesis 26:10 [Tafsir Rasag, Genesis 26:10](https://torahapp.org/share/book/Tafsir%20Rasag/s/Genesis/r/26:10) קאל אבימלך מא ד̇א צנעת בנא ען קליל לו צ̇אג̇ע אחד קומנא זוג̇תך לג̇לבת עלינא את̇מא ###### Tafsir Rasag, Genesis 26:11 [Tafsir Rasag, Genesis 26:11](https://torahapp.org/share/book/Tafsir%20Rasag/s/Genesis/r/26:11) פנאדי פי ג̇מיע אלקום קאילא מן אד̇א הד̇א אלרג̇ל או זוג̇תה פליקתל קתלא ###### Tafsir Rasag, Genesis 26:12 [Tafsir Rasag, Genesis 26:12](https://torahapp.org/share/book/Tafsir%20Rasag/s/Genesis/r/26:12) ת̇ם זרע אסחק פי תלך אלארץ̇ פוג̇ד פי תלך אלסנה מאיה באלחזר ובארך אללה לה ###### Tafsir Rasag, Genesis 26:13 [Tafsir Rasag, Genesis 26:13](https://torahapp.org/share/book/Tafsir%20Rasag/s/Genesis/r/26:13) פכת̇ר אלרג̇ל וכאן כל מא מר כת̇ר אלי אן עט̇ם ג̇דא ###### Tafsir Rasag, Genesis 26:14 [Tafsir Rasag, Genesis 26:14](https://torahapp.org/share/book/Tafsir%20Rasag/s/Genesis/r/26:14) פצארת לה מאשיה גנם ובקר וחשם כת̇יר חתי חסדוה אלפלסטיניון ###### Tafsir Rasag, Genesis 26:15 [Tafsir Rasag, Genesis 26:15](https://torahapp.org/share/book/Tafsir%20Rasag/s/Genesis/r/26:15) וג̇מיע אלאבאר אלתי חפרהא עביד אביה עלי עהד אברהים אביה כאן קד סדהא אלפלסטיניון ומלוהא תראבא ###### Tafsir Rasag, Genesis 26:16 [Tafsir Rasag, Genesis 26:16](https://torahapp.org/share/book/Tafsir%20Rasag/s/Genesis/r/26:16) ת̇ם קאל אבימלך לאסחק אמץ̇ מן ענדנא פאנך קד עט̇מת מנא ג̇דא ###### Tafsir Rasag, Genesis 26:17 [Tafsir Rasag, Genesis 26:17](https://torahapp.org/share/book/Tafsir%20Rasag/s/Genesis/r/26:17) פמצ̇א אסחק מן ת̇ם ונזל פי ואדי אלכ̇לוץ ואקאם ת̇ם ###### Tafsir Rasag, Genesis 26:18 [Tafsir Rasag, Genesis 26:18](https://torahapp.org/share/book/Tafsir%20Rasag/s/Genesis/r/26:18) ת̇ם עאד פחפר אבאר אלמא אלתי כאנת חפרת פי איאם אברהים אביה וסדהא אלפלסטיניון בעד מותה וסמאהא באסמא כמא סמאהא אברהים אבוה ###### Tafsir Rasag, Genesis 26:19 [Tafsir Rasag, Genesis 26:19](https://torahapp.org/share/book/Tafsir%20Rasag/s/Genesis/r/26:19) ולמא חפרו עביד אסחק פי אלואדי וג̇דו ת̇ם ביר מא נאבע ###### Tafsir Rasag, Genesis 26:20 [Tafsir Rasag, Genesis 26:20](https://torahapp.org/share/book/Tafsir%20Rasag/s/Genesis/r/26:20) פכ̇אצם רעאה אלכ̇לוץ מע רעאה אסחק קאילין לנא אלמא פסמי אלביר שגלא למא אשתגלו מעה ###### Tafsir Rasag, Genesis 26:21 [Tafsir Rasag, Genesis 26:21](https://torahapp.org/share/book/Tafsir%20Rasag/s/Genesis/r/26:21) וחפרו בירא אכ̇רי פכ̇אצמוה עליהא פסמאהא ד̇את אלענאד ###### Tafsir Rasag, Genesis 26:22 [Tafsir Rasag, Genesis 26:22](https://torahapp.org/share/book/Tafsir%20Rasag/s/Genesis/r/26:22) ת̇ם אנתקל מן ת̇ם וחפר בירא אכ̇רי ולם יכ̇אצמוה עליהא פסמאהא ד̇את אלסעה וקאל אלאן יוסע אללה לנא וינמינא פי אלבלאד ###### Tafsir Rasag, Genesis 26:23 [Tafsir Rasag, Genesis 26:23](https://torahapp.org/share/book/Tafsir%20Rasag/s/Genesis/r/26:23) ת̇ם צעד מן ת̇ם אלי ביר סבע ###### Tafsir Rasag, Genesis 26:24 [Tafsir Rasag, Genesis 26:24](https://torahapp.org/share/book/Tafsir%20Rasag/s/Genesis/r/26:24) ותג̇לא לה אללה פי תלך אללילה וקאל אנא אלאה אברהים אביך לא תכ̇ף פאני מעך אבארך עליך ואכת̇ר נסלך בסבב אברהים עבדי ###### Tafsir Rasag, Genesis 26:25 [Tafsir Rasag, Genesis 26:25](https://torahapp.org/share/book/Tafsir%20Rasag/s/Genesis/r/26:25) ובנא ת̇ם מד̇בחא ודעא באסם אללה ומד ת̇ם כ̇באה וכרו ת̇ם עביד אסחק בירא ###### Tafsir Rasag, Genesis 26:26 [Tafsir Rasag, Genesis 26:26](https://torahapp.org/share/book/Tafsir%20Rasag/s/Genesis/r/26:26) ואבימלך צאר אליה מן אלכ̇לוץ ואחזת נדימה ופיכל רייס ג̇ישה ###### Tafsir Rasag, Genesis 26:27 [Tafsir Rasag, Genesis 26:27](https://torahapp.org/share/book/Tafsir%20Rasag/s/Genesis/r/26:27) פקאל להם אסחק מא באלכם ג̇יתם אלי ואנתם שניתמוני וטרדתמוני מן ענדכם ###### Tafsir Rasag, Genesis 26:28 [Tafsir Rasag, Genesis 26:28](https://torahapp.org/share/book/Tafsir%20Rasag/s/Genesis/r/26:28) קאל אנא ראינא אן אללה מעך פקלנא יכון אלאן חרג̇ ביננא ובינך ונעאהדך עהדא ###### Tafsir Rasag, Genesis 26:29 [Tafsir Rasag, Genesis 26:29](https://torahapp.org/share/book/Tafsir%20Rasag/s/Genesis/r/26:29) אלא תצנע בנא שרא כמא לם נוד̇ך וכמא צנענא מעך כ̇ירא מחצ̇א ואטלקנאך בסלאם פאנת אלאן מבארך אללה ###### Tafsir Rasag, Genesis 26:30 [Tafsir Rasag, Genesis 26:30](https://torahapp.org/share/book/Tafsir%20Rasag/s/Genesis/r/26:30) פצנע להם מג̇לסא אכלו פיה ושרבו ###### Tafsir Rasag, Genesis 26:31 [Tafsir Rasag, Genesis 26:31](https://torahapp.org/share/book/Tafsir%20Rasag/s/Genesis/r/26:31) ואדלג̇ו באלגדאה פחלף כל אמר לאכ̇יה פאטלקהם אסחק ומצ̇ו מן ענדה בסלאם ###### Tafsir Rasag, Genesis 26:32 [Tafsir Rasag, Genesis 26:32](https://torahapp.org/share/book/Tafsir%20Rasag/s/Genesis/r/26:32) ולמא כאן פי ד̇לך אליום ג̇או עביד אסחק פאכ̇ברוה בסבב אלביר אלד̇י חפרוה וקאלו לה קד וג̇דנא מאא ###### Tafsir Rasag, Genesis 26:33 [Tafsir Rasag, Genesis 26:33](https://torahapp.org/share/book/Tafsir%20Rasag/s/Genesis/r/26:33) פסמאהא סבעה ולד̇לך אסם אלקריה ביר סבע אלי הד̇א אליום ###### Tafsir Rasag, Genesis 26:34 [Tafsir Rasag, Genesis 26:34](https://torahapp.org/share/book/Tafsir%20Rasag/s/Genesis/r/26:34) ולמא כאן עשו אבן ארבעין סנה תזוג̇ באמראה אסמהא יהודית בנת בארי אלחתי ובשמת בנת אלון אלחתי ###### Tafsir Rasag, Genesis 26:35 [Tafsir Rasag, Genesis 26:35](https://torahapp.org/share/book/Tafsir%20Rasag/s/Genesis/r/26:35) פכאנתא מכ̇אלפתי ראי אסחק ורבקה