בעד הבה אלאמור כאן קול אללה לאברם בוחי קאילא לא תכ̇ף אברם אנא תרסך אג̇רך עט̇ים ג̇דא

קאל אללהם יא רב מא תעטיני ואנא מנצרף עקימא וד̇ו קיאד מנזלי אליעזר אלדמשקי

פקאל אד̇ לם תרזקני נסלא פאן אלאבן אלד̇י פי מנזלי ירת̇ני

פאד̇א בקול אללה קאילא לה לא ירת̇ך הד̇א אלא מן יכ̇רג̇ מן צלבך הו ירת̇ך

ת̇ם אכ̇רג̇ה אלי כ̇ארג̇ וקאל לה אלתפת אלי אלסמא ואלתמס אחצא אלכואכב הל תטיק תחציהא ת̇ם קאל לה כד̇א יכון נסלך

פאמן באללה וכתבהא לה חסנה

וקאל לה אנא אללה אלד̇י אכ̇רג̇תך מן אתון אלכסדיאניין לאעטיך הד̇א אלבלד לתחוזה

קאל אללהם יא רב במא ד̇א אעלם אני אחוזה

קאל לה קדם לי עג̇לא מת̇לת̇א וענזא מת̇לת̇א וכבשא מת̇לת̇א ושפנינא ופרך̇ חמאם

פקדם לה ג̇מיע ד̇לך ושטרהא פי אוסאטהא ת̇ם ג̇על כל שטר תלקא צאחבה ואלטאיר לם ישטרה

ת̇ם וצ̇ע אלטאיר עלי אלאג̇סאד וחרכהא אברם פתחרכת

ולמא כאן ענד מגיב אלשמס וקע סבאת עלי אברם פאד̇א בהיבה ט̇למה עט̇ימה קד וקעת עליה

פקאל לאברם אעלם עלמא אן סיכון נסלך גריבא פי בלד ליס להם ויסתעבדוהם ויעד̇בונהם ארבע מאיה סנה

ואיצ̇א אלקום אלד̇ין יסתכ̇דמונהם פאחכם עליהם ובעד ד̇לך יכ̇רג̇ון בסרח עט̇ים

ואנת תציר אלי אבאיך בסלאם ותדפן בשיבה צאלחה

ואלג̇יל אלראבע ירג̇ע אלי ההונא אד̇ לם יכמל ד̇נב אלאמוריין אלי אלאן

פלמא גאבת אלשמס וכאנת אלדהמה פאד̇א בשביה תנור דכ̇אן ופליל נאר ג̇אז בין תלך אלאשטאר

פי ד̇לך אליום עהד אללה מע אברם עהדא קאילא לנסלך אעטי הד̇א אלבלד מן נהר מצר אלי אלנהר אלכביר נהר אלפראת

אלקיניין ואלקניזיין ואלקדמוניין

ואלחיתיין ואלפריזיין ואלשג̇עא

ואלאמוריין ואלכנעאניין ואלג̇רג̇שיין ואליבוסיין